Migrar é un dereito; porén, as persoas migrantes e refuxiadas que viven no noso país ou que chegan ás nosas fronteiras ven os seus dereitos vulnerados de xeito sistemático. Perante esta realidade, resulta preciso monitorizar e denunciar as situacións de vulneración de dereitos e propoñer solucións para asegurar que as persoas migrantes e refuxiadas teñen garantidos os seus dereitos, á vez que se promoven narrativas que confronten os discursos de odio e a discriminación.

A crise climática agrava as desigualdades socioeconómicas e de xénero en todo o mundo e pon en risco os dereitos das persoas en situación de vulnerabilidade. É urxente esixir xustiza climática para que as persoas, as comunidades e os países máis afectados poidan adaptarse e reverter as perdas e os danos causados pola crise climática, así como promover unha economía sostible e unha transición enerxética xusta para que ninguén fique atrás. Influír cara a unhas políticas climáticas e transicións xustas, impulsar accións de mobilización social e construír narrativas ecofeministas é fundamental para lograr a xustiza climática.

Coidar é soster a vida. O traballo dos coidados asúmeno sobre todo mulleres —moitas delas de orixe migrante—, non está recoñecido a nivel social e, en moitos casos, tampouco está remunerado dignamente. Cómpre avanzar cara a unha organización xusta dos coidados que respecte os dereitos das persoas que reciben os coidados e as que os proporcionan. Por tanto, é capital promover políticas públicas e prácticas empresariais que poñan os coidados no centro, transformar os imaxinarios sociais e reivindicar o dereito ao coidado como algo esencial.

Os movementos feministas interseccionais (antirracistas, transinclusivos e populares) e os movementos LGTBIQ+ son un gran motor de cambio cara o recoñecemento de dereitos e a fin das desigualdades.

A xustiza de xénero e diversidade busca desafiar as estruturas heteropatriarcais e coloniais por medio de políticas e leis que protexan a todas as persoas e mais do fomento dunha educación inclusiva e libre de estereotipos de xénero.

É hora de poñer as persoas e o planeta no centro do sistema produtivo. Por iso, é preciso promover cambios normativos que contribúan a transformar o modelo produtivo para que sexa sostible en termos medioambientais e xere un mercado de traballo máis xusto, con empregos dignos, de calidade e en condicións xustas para todas as persoas. É igualmente esencial apoiar as organizacións que garanten condicións laborais dignas para os colectivos en situación de maior vulnerabilidade.

O acceso a un sistema de protección social é primordial para reducir as desigualdades e a pobreza. Por este motivo, cómpre mellorar o deseño e a implementación do sistema de protección social en España, co fin de garantir que todas as persoas, sobre todo os colectivos e os fogares máis vulnerables do noso país, accedan aos recursos necesarios para ter unha vida digna e un futuro en igualdade de oportunidades.