Migratzea eskubide bat da. Hala ere, gure herrialdean bizi diren edo gure mugetara iristen diren migratzaileen edo errefuxiatuen eskubideak modu sistematikoan urratzen dira. Errealitate horren aurrean, eskubideak urratzen diren egoerak monitorizatu eta salatu behar dira, eta irtenbideak proposatu behar dira migratzaileen eta errefuxiatuen eskubideak bermatuta daudela ziurtatzeko. Aldi berean, gorrotoan eta bazterkerian oinarritutako diskurtsoei kontra egiteko narratibak sustatu behar dira. 

Krisi klimatikoak larriagotu egiten ditu mundu osoko desberdintasun sozioekonomikoak eta genero-desberdintasunak, eta arriskuan jartzen ditu zaurgarritasun-egoeran dauden pertsonen eskubideak. Presazkoa da justizia klimatikoa eskatzea, herrialde, komunitate eta pertsona kaltetuenak egokitu ahal izateko eta krisi klimatikoak eragindako galerak eta kalteak leheneratzeko. Era berean, ekonomia jasangarria eta bidezko trantsizio energetikoa sustatu behar dira, inor atzean geratu ez dadin. Justizia klimatikoa lortzeko, funtsezkoa da politika klimatikoak eta bidezko trantsizioak sustatzea, gizartea mobilizatzeko ekintzak bultzatzea eta narratiba ekofeministak eraikitzea.

Bizitzari eustea da zaintzea. Zaintza-lanak emakumeen esku egoten dira, nagusiki, eta emakume horietako asko etorkinak dira. Aipatutako lana gizartean ez dago aintzatetsita, eta askotan ez da duintasunez ordaintzen. Beharrezkoa da zaintza jasotzen duten pertsonen eta zaintzaileen eskubideak errespetatuko dituen zaintza-lanen antolaketa justua lortzeko lan egitea. Horretarako, ezinbestekoa da zaintza erdigunean jartzen duten politika publikoak eta enpresa-politikak sustatzea, gizarteko iruditeriak aldatzea eta zaintza-eskubidea aldarrikatzea, funtsezko zerbaiten gisara. 

Mugimendu feminista intersekzionalak (arrazakeriaren aurkakoak, transinklusiboak eta herrikoiak) eta LGTBIQ+ mugimenduak eskubideen onarpenerako eta desberdintasunen amaierarako aldaketa-eragile handiak dira. 

Genero-justizia eta aniztasunaren helburua egitura heteropatriarkalei eta kolonialei aurre egitea da, pertsona guztiak babestuko dituzten politiken eta legeen bidez eta genero-estereotipoetatik aske egongo den hezkuntza inklusiboa sustatuz.

Pertsonak eta planeta ekoizpen-sistemaren erdigunean jartzeko unea da. Hori dela eta, ekoizpen-eredua eraldatzen lagunduko duten araudi-aldaketak sustatu behar dira, ekoizpen-eredua jasangarria izan dadin ingurumenari dagokionez, eta lan-merkatu justuagoa sor dadin, kalitatezko lanpostu duinekin eta pertsona guztientzat justuak diren baldintzekin. Era berean, funtsezkoa da zaurgarritasun handieneko egoeran dauden kolektiboentzako lan-baldintza duinak bermatzen dituzten erakundeei laguntzea. 

Gizarte-babeserako sistema bat eskura izatea funtsezkoa da desberdintasunak eta pobrezia murrizteko. Horretarako, Espainiako gizarte-babeserako sistemaren diseinua eta ezarpena hobetu behar dira, pertsona guztiek bizimodu duina eta aukera-berdintasunean oinarritutako etorkizuna izateko beharrezko baliabideak eskuragarri dituztela bermatzeko, bereziki, gure herrialdeko kolektibo eta familia zaurgarrienek.